Lo Yorkshire Pudding

Vos vau parlar uèi d’una especialitat salada anglesa ( que fins ara, me soi mai que mai concentrada sul sucrat ) : lo Yorkshire pudding. Vos rasseguri, es pas un pudding al Yorkshire ( i a ja lo can caud dels Americans, e en mai d’aquò ai pas fòrça enveja de me trapar amb la SPA e Brigitte Bardot sus l’esquina per aver butat lo mond a passar Chopeta a la grasilha, puèi al mesclaire e ne far un pastís per finir… pensada gòra de la nuèch finida, mercé per los que son demorats ). Donc, per tornar al Yorkshire pudding ( o Yorkies pels intims ), es un pastisson fòrça aisit de far, tot confle, tot mofle e tot leugièr qu’es servit en Anglatèrra amb lo rostit qu’es lo plat tradicional del dimenge ( tanben conegut jol nom de Sunday Roasty, s’inventa pas ).

Pel Yorkshire Pudding, vos caldrà : 125 gramas de farina, 2 uòus, 200 millilitres de lach e un pauc d’òli. Vos caldrà tanben 6 mòtles redonds ( es melhor se los bords son liscs, mas si que non, podètz prene de mòtles a muffins ). La recèpta es simpla : calfatz lo forn a 200°C. Mesclatz la farina, lo lach e los uòus fins a ço que la pasta venga omogèna ( dèu semblar un pauc de pasta a crèsps ). Metètz puèi un pauc d’òli dins lo fons dels mòtles, e versatz la pasta dins los mòtles. Butatz al forn, e daissatz coire per un vintenat de minutas, fins a çò que sián confles e daurats.

Normalament, per los servir a l’anglesa, vos o cal servir amb un rostit de buòu, de legums bolhits o al forn e una salsa al vin roge e al bolhon de buòu. Mas coma en cosina la normalitat se dèu pas totjorn sègre ( e pas qu’en cosina siá dich en passant ), se pòt servir amb çò que volètz, emai ensajar d’emplenar amb çò que volètz. Sabi qu’i a de mond qu’an ensajat amb de purèa de peses ; mas coma ai dich, es de noiridura per Angleses !

Al còp que ven !

Nan lo Penche